Ata që më ndjekin në rrjetet sociale e dinë që unë kam qenë gjithmonë partizane e kafes të bërë në shtëpi. Gjithë këto vite praktikë më rezultuan ekstra të dobishme në këto momente apokaliptike ku përveç ndonjë furre buke që ndodh të ketë eskpres, kafen nuk e gjen më askund. Në fakt, për mua nuk përbën ndonjë ndryshim të madh. Edhe para se të ndodhte gjithë kjo, të paktën kafen e mëngjesit e kam pregatitur rigorozisht në shtëpi. Kur jetoja jashtë e alternoja patjetër me filtrat e flat white-s në kafetë specialty që vizitoja, por sa herë që shkoja në këto kafene, përfundoja duke blerë kafe ose pajisje për të bërë kafen në shtëpi. Në fund të fundit asgjë nuk krahasohet me kafen e parë të mëngjesit që pregatit sapo zgjohesh, me muzikë apo emisionin/podcast-in e preferuar në sfond, pak momente qetësie dhe meditimi pëpara se të të godasë vrulli i ditës.

Më kujtohet pajisja e parë që bleva për të pregatitur kafe në shtëpi: një French Press që gjeta në supermarket e që në ato momente më dukej i koklavitur për t’u përdorur. Patjetër që rutina ime e kafes (ashtu si njohuritë mbi të) janë sofistikuar shumë që atëherë, e megjithatë pavarësisht aparatit apo metodës së përdorur, ka ca parime bazë që sigurojnë që kafja e mëngjesit të jetë edhe një ritual i kënaqshëm përveçse një pilulë zgjimi.

1. Lloji i kafes

Patjtetër që lloji i kafes së përdorur është faktori kryesor. Kafeja Instant që ke në raft prej disa muajsh nuk do të të japë rezultatet që do. Por një kafe e freskët (nuk ka më shumë se një muaj nga data e pjekjes) e ruajtur në kushtet e duhura (enë hermetike, në një vend të errët pa aroma dhe lagështi) është një hap i parë i mirë. Them i parë sepse mund të bëhet edhe më mirë: kafe e pjekur lehtë, të cilës i dihet origjina dhe varieteti. Këto lloj kafesh patjetër që nuk gjenden në raftet e supermarketit por në dyqane të specializuara për kafen.

2. Bluarje në çast

Më vijnë shpesh pyetje nëse është e domosdoshme ta bluash kafen në çast. Domosdoshmëria e një mulliri dore është relative, por nëse jeni duke kërkuar të përmirësoni eksperiencën e kafes në shtëpi, kafja që është bluar paraprakisht nuk do t’ju bëjë ndonjë nder. Arsyeja pse një mulli dore është kaq i vlefshëm është se kafeja ruhet më mirë në trajtë kokërr se sa të bluar. Kur kokrrat bluhen, secila prej tyre ka sipërfaqe kontakti me ajrin dhe si pasojë oksidohet më shpejt. Në trajtë kokrre oksidimi është më i ngadaltë dhe kafja mund të zgjasë shumë më shumë. Për më tepër pasja e një mulliri në shtëpi ju lejon ta pështasni bluarjen sipas metodës që po përdorni.

3. Përdor një peshore

Kur flas për rëndësinë e peshores, përdor gjithmonë analogjinë e kekut. Nëse një kek ka nevojë për 3 vezë dhe 200 g miell, ndryshimi i këtij raporti patjetër që nuk do vazhdojë të japë të njëjtin rezultat. I njëjti princip vlen edhe për raportin kafe:ujë. Ka një raport të caktuar me të cilin arrihet rezultati i duhur: ekstraktim i duhur (as shumë e hidhur, as shumë e thartë), shije komplekse dhe nuanca të balancuara. Ky është një ndër aspektet më të anashkaluara kur vjen puna tek bërja e kafes jo vetëm në shtëpi, por edhe në kafene. Një raport i mirë për fillestarët është 1:16 për kafen filtër, pra nëse po përdorni 15 g kafe, zerojeni peshoren dhe shtoni 250 g ujë. Me kalimin e kohës mund të filloni të eksperimentoni me raportet kafe ujë, por ky është një benchmark i mirë për t’ja nisur.

4. Uji

Fakt: 98% e kafes është ujë. Të gjithë e dimë që pjesa më e madhe e kafes është ujë dhe prapë nuk e vlerësojmë sa duhet impaktin që ka uji i përdorur në bërjen e kafes. Uji i çezmes është i trajtuar me kimikate dhe minerale të cilat, edhe pse nuk i ndjejmë domosdoshmërisht tek vetë uji, pengojnë nuancat e shijes të dalin në pah. Filtrimi i ujit të çezmës është një alternativë e mirë pasi heq papastërtitë dhe klorin. Uji i blerë në shishe është gjithashtu një opsion, edhe pse lloje të ndryshme kanë përmbajtje të ndryshme kripërash e mineralesh. Nëse keni mundësi, zgjidhni një ujë me përmbajtje të lartë Magnezi.

Bonus: Nëse do zgjidhja edhe dy faktorë të tjerë për t’ja shtuar listës, do ishin temperatura dhe koha. Temperatura e ujit ideale për ekstraktimin e kafes është midis 90 dhe 96 gradë Celsius, por nëse nuk keni termometër një hile që funksionon është të presësh 10 sekonda pasi uji ka zier. Ngrohja e enëve dhe gotave apo filxhanëve ku do të konsumoni kafen, është gjithashtu një mënyrë e mirë për të mos humbur nxehtësi. Koha është një faktor tjetër i rëndësishëm. Sa më e gjatë koha e kontaktit të kafes me ujin, aq më i lartë niveli i ekstraktimit. Nëse preferoni një kafe pak më të hidhur, zgjatja e kohës së kontaktit jua mundëson këtë, ndërsa për një kafe me nuanca më të ëmbla, koha duhet të jetë më e shkurtër.

E megjithatë, mënyra më e mirë eshtë të eksperimentosh dhe të shohësh çfarë të pëlqen dhe çfarë jo. Të gjitha këto ndryshore si raporti kafe:ujë, koha, temperatura dhe bluarja nuk do të bëjnë kuptim nëse nuk filloni të eksperimentoni me to. Fillojeni me një pajisje si French Press, V60, apo Aeropress, mbani një mendje të hapur dhe shijojeni procesin. Çdo eksperiment i vogël do t’ju bëjë të kuptoni se si e pëlqeni kafen dhe mbi të gjitha se si ta bëni atë më mirë.

you're currently offline

Columbia Supremo

Pin It on Pinterest